1. الرئيسية
  2. المقالات
  3. المخزون والمشتريات
  4. حساب تكلفة الوجبة في المطعم: الوصفة والهدر والجرد

حساب تكلفة الوجبة في المطعم: الوصفة والهدر والجرد

معادلة حساب تكلفة الوجبة بمثال عملي، وإزاي الوصفة تخصم الخامات من المخزون أوتوماتيك، وتسجيل الهدر، والجرد اللي بيكشف الفرق بين النظري والفعلي.

6 دقائق قراءة فريق اي ار كاشير
وصفة طبق في اي ار كاشير بتكلفة الخامات وهامش الربح

حساب تكلفة الوجبة بيتم بمعادلة واحدة: لكل خامة في الطبق اضرب الكمية × (1 + نسبة الهدر) × تكلفة وحدة الخامة، واجمع الكل. بعدها اقسم التكلفة على سعر البيع تعرف نسبة تكلفة الطعام، واطرحها من السعر تعرف ربح الطبق. الكلام سهل على الورق، لكن الصعب إن الرقم يفضل صح كل يوم وأسعار الخامات بتتغيّر والهدر بيحصل والمخزن بيختلف عن الدفتر. في المقال ده هنحسب مثال عملي، ونشرح إزاي «اي ار كاشير» بيربط الوصفة بالمخزون والهدر والجرد عشان الرقم يفضل حقيقي.

معادلة حساب تكلفة الوجبة

  • تكلفة الخامة في الطبق = الكمية × (1 + نسبة الهدر ÷ 100) × تكلفة الوحدة.
  • تكلفة الطبق = مجموع تكلفة كل الخامات.
  • نسبة تكلفة الطعام = تكلفة الطبق ÷ سعر البيع × 100.
  • هامش الربح = (سعر البيع − تكلفة الطبق) ÷ سعر البيع × 100.

ليه الهدر جوه المعادلة؟ لأن كيلو البصل مثلاً ممكن يطلع منه 900 جرام صالحين بس بعد التقشير. لو حسبت الكمية «الصافية» بسعر الكيلو، التكلفة هتطلع أقل من الحقيقة، والطبق هيبان كسبان وهو مش كده.

مثال عملي بأرقام افتراضية

طبق «كفتة مشوية» بسعر بيع 240 جنيه. الأسعار والكميات هنا للتوضيح بس، واحسب بأرقام مطبخك:

الخامةالكميةالهدرتكلفة الوحدةالتكلفة في الطبق
لحمة مفرومة0.200 كجم5%380 ج/كجم79.80
بصل0.030 كجم10%20 ج/كجم0.66
توابل0.005 كجم0%300 ج/كجم1.50
عيش2 رغيف0%1.50 ج/رغيف3.00
طحينة وسلطة0.050 كجم0%60 ج/كجم3.00
الإجمالي———87.96

تكلفة الطبق 87.96 جنيه، يعني نسبة تكلفة الطعام حوالي 37%، والهامش حوالي 63%، وربح الطبق 152.04 جنيه قبل باقي المصاريف زي الإيجار والمرتبات والكهربا.

إزاي «اي ار كاشير» بيحسب تكلفة الطبق

من صفحة «الوصفات وتكلفة الطبق» بتفتح أي صنف في المنيو وتضيف مكوّناته من أصناف المخزون: الخامة، والكمية، ونسبة الهدر، وملاحظة لو حبيت زي «مفروم ناعم». الوحدة بتظهر لوحدها حسب وحدة الخامة في المخزون، وتكلفة كل سطر بتتحسب قدامك وإنت بتكتب.

  • فوق الوصفة بتشوف: سعر البيع، وتكلفة الخامات، وهامش الربح، وربح الطبق.
  • الهامش بيتلوّن: أخضر من 60% ولفوق، أصفر من 30% لحد 60%، وأحمر تحت 30%، فالأطباق اللي محتاجة مراجعة بتبان من أول نظرة.
  • جدول كل الأطباق بيوريك تكلفة الخامات والسعر والربح والهامش لكل طبق، وتقدر تفلتر «لها وصفة» أو «بلا وصفة».
  • من نفس الصفحة بتربط الطبق بمحطة التحضير (المطبخ الساخن، البار، الحلويات…) عشان يظهر في شاشة المطبخ الصح.

والأهم إن تكلفة الخامة نفسها بتتحدّث لوحدها: كل ما تستلم بضاعة من مورد، سعر تكلفة الصنف بيتحسب بالمتوسط المرجّح على الرصيد كله، فتكلفة كل الأطباق اللي فيها الخامة دي بتتغيّر معاها من غير ما تعدّل الوصفات واحدة واحدة.

خصم الخامات من المخزون أوتوماتيك

لما الطلب يتقفل ويتدفع، النظام بيخصم مكوّنات كل طبق فيه من مخزون الفرع اللي اتعمل فيه الطلب، بالكمية والهدر زي ما في الوصفة، ومرة واحدة بس حتى لو الطلب اتبعت تاني. كل خصم بيظهر في «حركات المخزون» بملاحظة «استهلاك وصفة — طلب مطعم #…»، وتكلفة الخامات بتتقيّد في الحسابات كتكلفة مبيعات.

وفيه نقطتين لازم تعرفهم بصراحة:

  • الطبق اللي ملوش وصفة مابيخصمش أي مخزون، وبيظهر في كارت «بلا وصفة (لا تخصم مخزوناً)». خلّص الكارت ده الأول.
  • النظام مابيمنعش قفل طلب اتطبخ واتقدّم لو رصيد خامة في السيستم مش كفاية؛ الرصيد بيبقى بالسالب، وده بيبان لك في الجرد كمشكلة في التسجيل محتاجة مراجعة بدل ما يستخبّى.

الهدر: الخسارة اللي محدش بيحسبها

الهدر هنا غير نسبة الهدر اللي في الوصفة. ده اللي بيخرج من المخزن ومابيتباعش: خضار باظت، طبق اتعمل غلط، أكل وقع. من صفحة «الهدر» بتسجّل الصنف والكمية والسبب من قايمة جاهزة: انتهاء صلاحية، تلف أثناء التحضير، خطأ في الطلب، إرجاع من الضيف، انقطاع تبريد، كسر أو سقوط، عيّنة أو تذوّق، أو أخرى.

الكمية بتتخصم من رصيد الفرع، وقيمتها بتتقيّد خسارة في الحسابات، والصفحة بتوريك أكتر الأصناف اللي اتهدرت بقيمتها في الفترة اللي تختارها. وهنا بيبدأ العلاج: لو الطماطم دايماً في أول القايمة، يبقى المشكلة في كمية الطلب من المورد أو في طريقة التخزين.

الجرد: الفرق بين النظري والفعلي

حتى مع وصفات مظبوطة، هتلاقي فرق بين الرصيد في السيستم واللي على الرف، والجرد هو اللي بيكشفه. في «اي ار كاشير» بتبدأ جلسة جرد لكل الأصناف أو لأقسام محددة بس زي خامات المطبخ، وتكتب الكميات المعدودة، والنظام بيوريك الأصناف اللي فيها فروق وقيمة الفروق. بعد المراجعة بتدوس «اعتماد»: رصيد كل صنف معدود بيتظبط على الكمية الفعلية، والفرق بيتسجّل حركة «تسوية» باسمك، ومعاك اختيار إنك تعتبر الأصناف اللي ماتعدّتش صفر.

نصيحة عملية: مش لازم تجرد المخزن كله كل مرة. ابدأ بالخامات الغالية اللي بتتحرك كل يوم زي اللحوم والفراخ والزيت، وخلّي جردها متكرر، وسيب الباقي لجرد شامل على فترات أطول. ولو لقيت فرق كبير في خامة معيّنة، راجع وصفتها ونسبة الهدر فيها قبل ما تشك في حد، لأن الوصفة اللي كميتها أقل من الحقيقة بتطلع عجز في الجرد كل مرة.

تقييم المخزون واقتراح الشراء

صفحة «تقييم وتحليل المخزون» بتوريك قيمة المخزون بالتكلفة وبسعر البيع، لكل فرع ولكل تصنيف، وتصنيف ABC، وكارت «رأس مال نائم» للأصناف الراكدة. وصفحة «اقتراح الشراء» بتحسب الكمية المقترحة من رصيدك ومعدّل استهلاكك واللي لسه جاي في أوامر الشراء، والعاجل بيظهر الأول.

خطوات ضبط تكلفة الوجبات في مطعمك

  1. سجّل الخامات كأصناف مخزون بوحدة واضحة (كيلو، لتر، رغيف) وسعر تكلفة حقيقي.
  2. زِن مكوّنات كل طبق مرة فعلياً في المطبخ، واكتب الوصفة بالكميات دي مش بالتقدير.
  3. حدد نسبة هدر واقعية للخامات اللي بتتنضف أو بتتقشر.
  4. راجع الأطباق اللي هامشها أحمر أو أصفر: عدّل السعر أو الكمية أو المكوّنات.
  5. استلم مشترياتك على النظام عشان التكلفة تتحدّث بالمتوسط المرجّح.
  6. سجّل الهدر يوم بيوم بسببه.
  7. اعمل جرد دوري لخامات المطبخ، وراجع الفروق مع الشيف قبل الاعتماد.

أسئلة شائعة

أكتب كمية الخامة في الوصفة بالجرام ولا بالكيلو؟

بنفس وحدة الخامة في المخزون. لو اللحمة متسجّلة بالكيلو، اكتب 0.150 يعني 150 جرام؛ خانة الكمية بتقبل كسور لحد أربع أرقام عشرية.

إيه نسبة تكلفة الطعام المناسبة؟

مفيش رقم واحد ينفع لكل مطعم؛ بيختلف حسب نوع الأكل والمنطقة وتكاليفك الثابتة. المهم تعرف رقمك الحقيقي لكل طبق، وتحط لنفسك حد تراجع عنده أي طبق بيعدّيه. ألوان الهامش في صفحة الوصفات بتساعدك تلاقي الأطباق دي بسرعة.

لو سعر خامة اتغيّر، لازم أعدّل كل الوصفات؟

لأ. الوصفة فيها الكميات بس، والتكلفة بتتقري من سعر تكلفة الخامة الحالي، اللي بيتحدّث مع كل استلام من المورد.

الخامات بتتخصم إمتى؟

وقت قفل الطلب ودفعه، ومرة واحدة بس لكل طلب، من مخزون الفرع اللي اتعمل فيه الطلب.

الوصفات والهدر والجرد جزء من «اي ار كاشير» للمطاعم، جنب الكاشير وشاشة المطبخ والدليفري والمنيو الإلكتروني. اتفرّج على درس المخزون والمشتريات اللي فيه حركات المخزون والجرد، وتابع درس المنيو: الإضافات والوصفات أول ما ينزل، واقرا دليل نظام كاشير المطاعم، وشوف الباقات حسب نوع نشاطك.

الوسوم:حساب تكلفة الوجبةتكلفة الطبقوصفات المطعممخزون المطعمالهدرالجرد
المقال مفيد؟ شاركه واتساب