ابدأ مع اي ار كاشير: الدخول والإعدادات والمستخدمين
أجزاء الدرس
اضغط على أي جزء والفيديو يروح له على طول.
عن الدرس
من أول تسجيل الدخول لحد درج النقدية: لوحة القيادة، وبيانات نشاطك والضريبة، والموظفين بأدوارهم وصلاحياتهم، وطرق الدفع.
في الدرس ده هتتعلم:
- تدخل على النظام بحسابك، وتقرا لوحة القيادة: مبيعات النهارده والشهر والإجراءات السريعة.
- تتنقل بين أقسام النظام من القايمة، وتوصل لأي صفحة بالبحث.
- تظبط بيانات نشاطك: الاسم والعملة واللوجو والتليفون والعنوان.
- تفعّل ضريبة القيمة المضافة بالنسبة والرقم الضريبي، وتحدد لو أسعار البيع شاملة الضريبة.
- تضيف كاشير جديد بحسابه، وتوقف حساب موظف ساب الشغل من غير ما تمسحه.
- تحدد صلاحيات كل دور: الصفحات اللي يفتحها، والإضافة والتعديل، والحذف والإلغاء.
- تجهّز طرق الدفع، وتضيف محفظة جديدة زي فودافون كاش على الحساب الصح.
- تتابع الوردية ودرج النقدية: السحب والإيداع، وفتح الدرج بسبب إجباري.
نص الشرح كلام الفيديو مكتوب
أهلاً بيك في اي ار كاشير، النظام اللي بيدير مطعمك أو محلك كله من مكان واحد: البيع، والمطبخ، والمخزون، والحسابات. وفي الفيديو ده هنبدأ من الأول: إزاي تدخل، وتظبط بيانات نشاطك، وتضيف الموظفين بصلاحياتهم.
كل موظف عنده حساب باسمه. بيكتب اسم المستخدم وكلمة السر، ويدوس دخول. وكل واحد بيشوف الشاشات اللي تخصّه بس، وده هنشوفه بعد شوية.
أول ما تدخل، بتفتح على لوحة القيادة: مبيعات النهارده وعدد طلباتها، ومبيعات الشهر كله. وتحتهم إجراءات سريعة بتوديك على طول لشاشات زي شاشة البيع وإضافة مستخدم. وتحت على الشمال، مربع اكتمال إعداد النشاط بيقولك فاضل إيه، زي رفع لوجو النشاط. وأي سطر فيه بيوديك على طول للصفحة بتاعته.
وعلى اليمين، القايمة فيها أقسام النظام اللي عندك: العملاء، ونقاط البيع، والمخزون، والمشتريات، والحسابات، وشؤون الموظفين، والتقارير، والمطاعم. وشاشة البيع ليها درس لوحدها، فخلّينا نجهّز النظام الأول. ولو مش فاكر الصفحة فين، اكتب اسمها في البحث اللي فوق، والقايمة هتفلتر لوحدها. نكتب إعدادات، ونفتح إعدادات النشاط.
هنا بنكتب اسم النشاط، وده اللي بيظهر في البرنامج وفي شاشة الدخول، وجنبه العملة. وبعدين نختار لوجو المحل من الكمبيوتر. وتحتها بيانات التواصل: التليفون والعنوان. وندوس حفظ الإعدادات، فاللوجو يظهر فوق في القايمة على طول.
وفوق، ضريبة القيمة المضافة. لو بتشتغل بيها، بتفعّلها وتكتب النسبة والرقم الضريبي، وتختار لو أسعار البيع شاملة الضريبة. والضريبة بتتحسب على الفواتير الجديدة بس، والقديمة بتفضل زي ما هي.
ننتقل للمستخدمين والصلاحيات. هنا كل اللي ليهم حساب على النظام، ودور كل واحد، وحالته: نشط ولا موقوف. نضيف كاشير جديد. ندوس إضافة مستخدم، ونكتب اسمه، واسم الدخول بالإنجليزي، وكلمة السر اللي هيدخل بيها. وفي دور الموظف نختار كاشير، وندوس حفظ. وأحمد اتضاف للقايمة. ولو موظف ساب الشغل، بتدوس تعديل وتخلّي حالته موقوف، فمبيقدرش يدخل تاني، من غير ما تمسح حسابه.
والدور هو اللي بيحدد الموظف يشوف إيه. من صفحة الأدوار والصلاحيات، لكل دور بنختار الصفحات اللي يفتحها، وهل يقدر يضيف ويعدّل، وهل يقدر يحذف ويلغي. دور الكاشير مثلاً: شاشة البيع والفواتير والمرتجعات والورديات، من غير طرق الدفع، ومن غير حذف. والمدير بيشوف كل حاجة دايماً، ولو محتاج دور جديد، تدوس زرار دور وتكتب اسمه، وبعدين تختار صلاحياته.
ولو أحمد دخل بحسابه، هيلاقي القايمة فيها بس الشاشات المسموحله بيها: البيع والفواتير والورديات، والعملاء، وطلبات المطعم. لا إعدادات، ولا مخزون، ولا حسابات.
نرجع لحساب المدير، ونفتح طرق الدفع. دي الطرق المتجهّزة عندنا: كاش، وفيزا، وإنستاباي أو محفظة، وآجل على حساب العميل، وتحويل بنكي لسداد الموردين. ولكل طريقة بتحدد تتسجّل على أنهي حساب، وتظهر في أنهي شاشة، وهل بتدخل درج الكاشير. وهنا الكاش بس هو اللي بيدخل الدرج، وبيرجع منه باقي للعميل. ولو عندك محفظة تانية، زي فودافون كاش، ندوس طريقة جديدة، ونكتب اسمها، ونوعها محفظة إلكترونية، ونختار الحساب اللي فلوسها تتسجّل عليه، وبعدين حفظ.
وبعد كده درج النقدية. من صفحة الورديات بتشوف ورديتك المفتوحة: الفلوس اللي بدأت بيها في الدرج، وكاش المبيعات، والمفروض يكون في الدرج كام دلوقتي. ولو طلّعت فلوس من الدرج، زي شراء خبز، بتسجّلها هنا سحب، وتكتب السبب والمبلغ. والمتوقع بيقل على طول، فمفيش عجز من غير تفسير لما تقفل الوردية. وبنفس الطريقة تسجّل إيداع، لو حطّيت فكّة في الدرج.
ومن صفحة الدرج والطابعات بتظبط الطابعة والدرج على كل جهاز كاشير. الدرج بيفتح لوحده بعد كل عملية كاش، أو يدوي من زرار فتح الدرج اللي فوق، وكل فتحة بتتسجّل باسم اللي فتحها ووقتها. وكمدير، تقدر تخلّي السبب إجباري لما حد يفتح الدرج من غير بيع، وتحدد مين يقدر يفتحه من صلاحيات الأدوار.
كده نشاطك جاهز للشغل. وفي الدروس الجاية هنكمّل باقي النظام خطوة بخطوة. اي ار كاشير، وإحنا معاك.